Reunidas 23 organizacións do sector pesqueiro extractivo e, unha vez analizada a SITUACIÓN, algúns dos principais RETOS e DESAFÍOS detectados son:

1.- A PESCA precisa políticas aplicables e realistas que permitan afrontar o presente e o futuro como unha actividade esencial e estratéxica que xera emprego, riqueza e cultura, e garante o abastecemento de alimentos, proporcionando á poboación unha proteína sostible e saudable.

2.- A FROTA pesqueira quere seguir desenvolvendo a súa actividade, pero co marco actual está seriamente comprometida a súa viabilidade económica, cunha redución continua da produción e sen atractivo para lograr a remuda xeracional.

3.- Precisamos un diagnóstico axeitado da realidade por parte das Administracións que permita tomar decisións adecuadas, medidas correctoras urxentes e deseñar as políticas necesarias.

Como RETOS DE FUTURO presentamos as CONCLUSIÓNS do XXVII ENCONTRO EMPRESARIAL de EXPOMAR e MANIFESTAMOS:

1º) Ámbito da UNIÓN EUROPEA

1. A PPC foi un éxito na recuperación ambiental dos stocks pesqueiros, pero foi un fracaso nos obxectivos económicos, sociais e de soberanía alimentaria. A recente avaliación da Comisión Europea sobre a PPC non foi rigorosa, nin realista, nin autocrítica.
2. Precisamos urxentemente un Regulamento ómnibus que permita simplificar normativas, reducir a burocracia, flexibilizar políticas e dar resposta a cambios necesarios como a revisión das 87 vedas, a revisión do Plan de xestión do Mediterráneo ou medidas desproporcionadas de Control como a obriga do rexistro desde o primeiro quilo capturado.
3. Manifestamos a nosa preocupación pola proposta de brutal recorte no novo Marco Financeiro Plurianual (de 6.100 a 2.000 millóns de euros), que non garante poder cumprir a política pesqueira común.
4. Pedimos o recoñecemento da Pesca como sector alimentario estratéxico europeo que máis contribúe a cumprir os Obxectivos de Desenvolvemento Sostible e a posta en marcha por parte da Comisión Europea dun Plan de Acción de alimentos azuis.

5. Pedimos a creación dun test de impacto ambiental comparado. Por cada unidade pesqueira eliminada, a proteína pesqueira é substituída por outras con maior pegada de carbono e hídrica. Trátase de evitar que as políticas europeas que destrúen a pesca vaian en contra da propia política ambiental da UE.

2º) Ámbito ESPAÑOL 

    6. Pedimos fortalecer a coordinación entre administracións para mellorar o atractivo fiscal e a competitividade da frota, con incentivos fiscais para empresarios e traballadores, e a redución ou eliminación do IVE, na liña dos países veciños e competidores. E outras medidas sociais como facilitar a xubilación activa.

    7. Pedimos o recoñecemento da prioridade que debe ter a Pesca nas políticas nacionais, tal e como dita o artigo 130.1 da Constitución Española, fronte a outras actividades empresariais enerxéticas que teñen alternativas en terra.

    8. En relación cos POEM (plans de ordenación do espazo marítimo) e a súa revisión, é necesario establecer zonas de uso prioritario para a pesca naquelas zonas onde están os caladoiros históricos e gozan dunha especial riqueza biolóxica e ambiental.

    9. Co obxecto de conseguir a ansiada remuda xeracional para as frotas, é necesario e urxente flexibilizar a formación e adaptala ás necesidades actuais, así como a homologación de titulacións con outras nacionalidades, do mesmo xeito que xa aplica a Mariña Mercante.

   10. Son moi urxentes medidas compensatorias fronte á gran subida dos prezos do combustible e da loxística, que fan inviable a nosa actividade.

3º) Ámbito de Comunicación e Consumo  

    11. Precisamos unha Estratexia Nacional de Promoción para impulsar o consumo de peixe da dieta Atlántica e pesco-mediterránea, co obxectivo de corrixir as tendencias negativas actuais e cumprir as recomendacións da AESAN e doutros colectivos científicos e sanitarios.v

    12. O sector asume un compromiso de traballar unido na promoción e divulgación dos beneficios nutricionais e na posta en valor do sector pesqueiro e das súas boas prácticas, a través de accións de comunicación conxuntas.